(1845-1895) Felicitación en dialecto asturiano
¡ Bones páscues, siñor !...¿ Non arrepára
en mió rostru 'l color de la vergüenza ?
¿ Qué facer ?... Soy ansina... y ánque probe
sufro al pidir daqué la pena negra.
Bien sé que 'l Rey del mundo pasó fames
y exemplu dió d' homilde 'n so probeza;
pero ¡ mialma ! ye duro tener bolsos
sin guardar nunca ' nellos una perra.
¿ Quien diz que tien el añu doce meses ?
Cuido yo, que colaron mas de trenta
des que vusté, bondósu y arrogante
l' aguilandu me dió por Noche-buena.
¡ Como si fos' agora lo recuerdo !...
na más que-i apurrí la papeleta,
escaciplando 'l bolsu del chalecu
col furton y polgar de la derecha,
sacó de lo mas fondo, relluciente,
un duru... si, señor..... un duru yera
y Alfonsin por mas señes, q' al garrállu
tuvi un amoriamientu de cabeza.
<< Dios i lo pague i dixe: faiga el cielu
que cuanto apetecer llegue na tierra,
en un cierrar los güeyos lo consiga
y envidiáu de préncipes lu vea.»
Pegué un corcóbu, respiré puxante,
y del ñeru del alma llancié fuera
tal ijujú, cual nunca miós paisanos
oyeron al finar alegre andecha.
Com' un galgu, les calles d' ísti Uviéo
atrás dexé, cesando na carrera
cuando 'n casa me ví:... llamé á mió madre,
qu' enriba d' un sergón, faltu de fueya,
lloraba abrazadina á una mió hermana
que la fame llambía:... ¡ probe neña !
Si tardo un poco más, cretura menos;
y á falta d' utru cantu, si morriera,
tendría la de tantu villancicu
conque asorda á la xente la reciella.
Más gracies á vusté, sorbió caldinos,
y viémosla á la postre muy contenta
pos col duru, hebo pan, pucheru frescu
y alegría á fartar .... ¡ benditu sea !
Será isti añu de peres ó peruyes ?
Esta duda m' abluca y atormenta;
pero quién dixo miéo .... ¡ Siñoritu !
¿ Non quier un ijujú más q' una quexa ?
¡ Míreme con afleutu !... Ruxa el tronu,
nieve, orbáye, granice, xele ó llueva,
non por eso m' encueyo, y delixente
voy d' aquí; p' acullá, con lixereza.
Ye verdá, que lo fáigo munches veces
en mangues de camisa; y pongo a preba
el pelleyu de suyo impremeable
sin costura ni oxal qu' estorvar pueda.
Pero nunca, xamás, vusté lo sabe;
anque fosca restrálle la tormenta
y les vieyes enciendan tenebráries,
á l' hora, tin, tilín, llamo á so puerta.
Más, si dalguna vez, tardi, EL CORREO
recibe, culpa ye de la sirvienta,
que fierve más q' un pote, con un cabu
que 'n cumpliendo, quiciás cumpla con ella.
Muda más de cortexos que de medies;
fái poco alloqueciala un trompeta,
dimpués un del resguardu, y non ye xusto
que por tarasca tal naide carezca.
¡ Mire cuantu turrón lleva aquel home
mezcláo con chochinos na bandexa !
¡ Cómo me pruye 'l tarazar un poco !
¡ Qué bien sabrá !... mal haiga la probeza.
¡ Juasús ! ¡ Juasús !... ¿ habrá mayor tormentu
que ver tanta rosquía, tanta almendra
y tantu mazapán, sin saborgallo
po l' amor de .... ¿ siñor, vusté 'n qué piensa ?
¿ Abobeció ?... Escace aína el bolsu
y saque resplandiente una moneda
como l' útra de marres, pos con menos,
isti su servidor nón se contenta.
Más si como aportar suele dacuando
tuviés' en vez d' un pesu, una peseta,
démela, y en deber me será cuatro
que desd' ísti momentu i cargo 'n cuenta.